Хөдөлмөр эрхлэлтийг дэмжих жижиг зээлийн арга хэмжээ хэрэгжиж эхэллээ

Монгол Улсын Ерөнхийлөгчийн санаачилсан “Цагаан алт” үндэсний хөдөлгөөний хэрэгжилтийн хүрээнд малын гаралтай түүхий эд арьс шир, ноос, ноолууран бүтээгдэхүүн боловсруулах үйлдвэрлэл, үйлчилгээг дэмжих зорилгоор Хөдөлмөр, эрхлэлтийг дэмжих сангаас Жижиг зээлийг арилжааны банкаар дамжуулан олгох үйл ажиллагаа эхэллээ. 

Жижиг зээлийг банкаар дамжуулан олгох үйл ажиллагаанд сонгон шалгаруулалт зохион байгуулж, Хаан банк, Төрийн банк шалгарсан байна. Хөдөлмөр, халамжийн үйлчилгээний ерөнхий газрын дарга З.Бауыржан, Хөдөлмөрийн бодлогын хэрэгжилтийн газрын дарга М.Батмагнай болон холбогдох албан хаагчид Хаан банк, Төрийн банкны төлөөлөлтэй уулзалт зохион байгуулж, гэрээний нөхцөл, хэрэгжилтийн талаар санал солилцон, хамтран ажиллах гэрээг байгууллаа.

Хөдөлмөр эрхлэлтийг дэмжих сангаас олгох жижиг зээлийг иргэдэд жилийн 7 хувийн хүүтэй, 36 хүртэл сарын хугацаатайгаар олгоно. Үүнд:

• Хувиараа хөдөлмөр эрхлэгч иргэн, малчинд – 20 хүртэл сая төгрөг 
• Нөхөрлөл, хоршоо байгуулах иргэн, гадаадаас эх орондоо эргэн ирсэн иргэнд–40 хүртэл сая төгрөг
• Бичил үйлдвэрлэл, үйлчилгээ эрхлэгчид – 50 хүртэл сая төгрөгийн санхүүжилт олгоно.

Хөдөлмөр эрхлэлтийг дэмжих сангийн жижиг зээл нь иргэдийн хөдөлмөр эрхлэх боломжийг нэмэгдүүлэх, өрхийн орлогыг тогтворжуулах, шинэ ажлын байр бий болгох, орон нутгийн эдийн засгийг дэмжих бодит хөрөнгө оруулалт юм.

“Цагаан алт” үндэсний хөдөлгөөн нь мал аж ахуйн түүхий эдийг дотооддоо боловсруулж, нэмүү өртөг шингэсэн бүтээгдэхүүн үйлдвэрлэх, малчдын орлогыг нэмэгдүүлэх, экспортыг нэмэгдүүлэх зорилготой арга хэмжээ бөгөөд тус хөдөлгөөний хүрээнд Хөдөлмөр эрхлэлтийг дэмжих сангаас хэрэгжүүлж буй ажлууд нь иргэдийн орлогыг нэмэгдүүлэх, түр болон байнгын ажлын байр бий болгох, нэмүү өртөг шингэсэн үйлдвэрлэлийг дэмжих замаар бодит үр дүн өгч байна.

Хөдөлмөр эрхлэлтийг дэмжих сангаас:

• 2024 онд 184 иргэн санхүүгийн дэмжлэг (20 хүртлэх сая төгрөг, барьцаагүй, хүүгүй, 3 жилийн хугацаатай)-т хамрагдаж, нийт 1,424,300,000 төгрөг, мөн арилжааны банкаар дамжуулан олгодог жижиг зээл (50 хүртлэх сая төгрөг)-ийн хүрээнд 10 иргэн 311,950,000 сая төгрөг,
• 2025 онд 174 иргэн санхүүгийн дэмжлэгт хамрагдаж 1,376,500,000 төгрөгийн дэмжлэг тус тус авсан байна.

Өөрөөр хэлбэл, 2 жилийн хугацаанд 368 иргэн 3,112,750,000 төгрөгийн санхүүжилт авч арьс шир, ноос ноолуурын чиглэлийн үйлдвэрлэл, үйлчилгээ эрхлэх санхүүгийн боломжтой болж, бодит хөдөлмөр эрхлэлт бий болсон байна.

Харин 2026 оныг Гэр бүл, хөдөлмөр, нийгмийн хамгааллын яамнаас “Хөдөлмөр эрхлэлтийг дэмжих жил” болгон зарласантай холбогдуулан хөдөлмөр эрхлэлтийн бүх төрлийн сургалт, төсөл хөтөлбөр, санхүүгийн дэмжлэг, жижиг зээлийг “Цагаан алт”, Тэрбум мод үндэсний хөдөлгөөний зорилттой уялдуулан хэрэгжүүлнэ. Ингэснээр ноос, ноолуур, арьс ширний боловсруулах үйлдвэрлэлийг дэмжих, орон нутагт нэмүү өртөг шингэсэн үйлдвэрлэлийг хөгжүүлэх, иргэд болон аж ахуйн нэгжүүдийн үйлдвэрлэл, үйлчилгээ эрхлэх боломжийг илүү өргөн хүрээнд нэмэгдүүлэхээр төлөвлөж байна.